ruTh jaane ka hai ghurur mujhe

ruuTh jaane kā hai ġhurūr mujhe

jabki hāsil nahīñ 'ubūr mujhe

ik ġhazal aur jab likhī maiñ ne

ranj ne de diyā surūr mujhe

'ishq ke aa.ine pe maar ke sang

kar diyā us ne chūr-chūr mujhe

jitnā aatā rahā mire nazdīk

mujh se kartā rahā vo duur mujhe

aur phir tū ne kar liyā apnā

ek din ḳhud pe thā ġhurūr mujhe

tire ḳhurshīd se bhī baḌh kar hai

merī qindīl kā ye nuur mujhe

maiñ ne us ko bhulā diyā dil se

ab vo yaad aa.egā zarūr mujhe

terī āñkhoñ meñ kho na jā.ūñ 'naqī'

is adā se to tū na ghuur mujhe

ruTh jaane ka hai ghurur mujhe

jabki hasil nahin 'ubur mujhe

ek ghazal aur jab likhi main ne

ranj ne de diya surur mujhe

'ishq ke aaine pe mar ke sang

kar diya us ne chur-chur mujhe

jitna aata raha mere nazdik

mujh se karta raha wo dur mujhe

aur phir tu ne kar liya apna

ek din KHud pe tha ghurur mujhe

tere KHurshid se bhi baDh kar hai

meri qindil ka ye nur mujhe

main ne us ko bhula diya dil se

ab wo yaad aaega zarur mujhe

teri aankhon mein kho na jaun 'naqi'

is ada se to tu na ghur mujhe