روٹھ جانے کا ہے غرور مجھے

روٹھ جانے کا ہے غرور مجھے

جبکہ حاصل نہیں عبور مجھے

اک غزل اور جب لکھی میں نے

رنج نے دے دیا سرور مجھے

عشق کے آئینے پہ مار کے سنگ

کر دیا اس نے چور چور مجھے

جتنا آتا رہا مرے نزدیک

مجھ سے کرتا رہا وہ دور مجھے

اور پھر تو نے کر لیا اپنا

ایک دن خود پہ تھا غرور مجھے

ترے خورشید سے بھی بڑھ کر ہے

میری قندیل کا یہ نور مجھے

میں نے اس کو بھلا دیا دل سے

اب وہ یاد آئے گا ضرور مجھے

تیری آنکھوں میں کھو نہ جاؤں نقیؔ

اس ادا سے تو تو نہ گھور مجھے