روٹھ کر اک ماہرو کیا میری محفل سے گیا

روٹھ کر اک ماہرو کیا میری محفل سے گیا

رنگ پھولوں سے گیا نغمہ عنادل سے گیا

ناؤ یادوں کی شفق کے پانیوں میں کھو گئی

رفتہ رفتہ یہ سماں بھی چشم ساحل سے گیا

تیرگی سی چھا گئی بام و در احساس پر

کون وقت شام اٹھ کر محفل دل سے گیا

تیری ہستی سے تلاطم تھا مری امواج میں

اب یہ پیچ و خم بھی زلف موج ساحل سے گیا

کیا ملا اے دل تجھے عشق بت گلفام سے

جام جم کی جستجو میں کوزۂ گل سے گیا

لاش بھی سالم نہ چھوڑی کشتگان‌ عشق کی

اب یہ شیوہ بھی نگاہ چشم قاتل سے گیا

شیخؔ جی ان مست آنکھوں سے رہو کچھ دور دور

جو یہاں تک آ گیا وہ بچ کے مشکل سے گیا