ruThe hain humse dost hamare kahan kahan

rūThe haiñ ham se dost hamāre kahāñ kahāñ

TuuTe haiñ zindagī ke sahāre kahāñ kahāñ

duniyā kī bāzgasht meñ apnī hī hai sadā

aise meñ koī tujh ko pukāre kahāñ kahāñ

ka.abe meñ thā sakūñ na kalīsā meñ chain thā

tujh se bichhaḌ ke din ye guzāre kahāñ kahāñ

tū thā rag-e-gulū se ziyāda qarīb-tar

DhūñDh aa.e tujh ko diid ke maare kahāñ kahāñ

taare kahīñ haiñ phuul kahīñ haiñ guhar kahīñ

bikhre hue haiñ ashk hamāre kahāñ kahāñ

sham.a bhī muztarib hai patañgā bhī muztarib

pahuñche haiñ soz-e-ġham ke sharāre kahāñ kahāñ

fursat mile kabhī to shab-e-ġham se poñchhnā

TuuTe haiñ chashm-e-'shauq' se taare kahāñ kahāñ

ruThe hain hum se dost hamare kahan kahan

TuTe hain zindagi ke sahaare kahan kahan

duniya ki bazgasht mein apni hi hai sada

aise mein koi tujh ko pukare kahan kahan

kabe mein tha sakun na kalisa mein chain tha

tujh se bichhaD ke din ye guzare kahan kahan

tu tha rag-e-gulu se ziyaada qarib-tar

DhunDh aae tujh ko did ke mare kahan kahan

tare kahin hain phul kahin hain guhar kahin

bikhre hue hain ashk hamare kahan kahan

shama bhi muztarib hai patanga bhi muztarib

pahunche hain soz-e-gham ke sharare kahan kahan

fursat mile kabhi to shab-e-gham se ponchhna

TuTe hain chashm-e-'shauq' se tare kahan kahan