ruThi hui jabin ko manaya kisi tarah

rūThī huī jabīñ ko manāyā kisī tarah

ik āstāñ pe sar ko jhukāyā kisī tarah

ġham kā nazar ne bhed na paayā kisī tarah

ye be-tukā hai raah par aaya kisī tarah

dāman butoñ kā dil se chhuḌāyā kisī tarah

armāñ ne baar ye bhī uThāyā kisī tarah

shikve rahe hijāb-e-ruḳh-e-nāz se bahut

āñkheñ milīñ to hosh na aaya kisī tarah

jis haal meñ huī thī mohabbat kī ibtidā

māhaul vo na lauT kar aaya kisī tarah

baaqī hai dil meñ sho.ala-e-ummīd kī jhalak

bujhne meñ ye charāġh na aaya kisī tarah

ham ne to bandagī meñ mohabbat ḳharīd lī

tum ne bhī koī qaul nibhāyā kisī tarah

qaid-e-qafas meñ manzar-e-gulshan to hai mudām

ik āshiyāñ hī raas na aaya kisī tarah

ḳhalvat kī bazm hī meñ rahā 'shād' bā-ḳhabar

shohrat ko rāhbar na banāyā kisī tarah

ruThi hui jabin ko manaya kisi tarah

ek aastan pe sar ko jhukaya kisi tarah

gham ka nazar ne bhed na paya kisi tarah

ye be-tuka hai rah par aaya kisi tarah

daman buton ka dil se chhuDaya kisi tarah

arman ne bar ye bhi uThaya kisi tarah

shikwe rahe hijab-e-ruKH-e-naz se bahut

aankhen milin to hosh na aaya kisi tarah

jis haal mein hui thi mohabbat ki ibtida

mahaul wo na lauT kar aaya kisi tarah

baqi hai dil mein shoala-e-ummid ki jhalak

bujhne mein ye charagh na aaya kisi tarah

hum ne to bandagi mein mohabbat KHarid li

tum ne bhi koi qaul nibhaya kisi tarah

qaid-e-qafas mein manzar-e-gulshan to hai mudam

ek aashiyan hi ras na aaya kisi tarah

KHalwat ki bazm hi mein raha 'shad' ba-KHabar

shohrat ko rahbar na banaya kisi tarah