روٹھی ہوئی جبیں کو منایا کسی طرح

روٹھی ہوئی جبیں کو منایا کسی طرح

اک آستاں پہ سر کو جھکایا کسی طرح

غم کا نظر نے بھید نہ پایا کسی طرح

یہ بے تکا ہے راہ پر آیا کسی طرح

دامن بتوں کا دل سے چھڑایا کسی طرح

ارماں نے بار یہ بھی اٹھایا کسی طرح

شکوے رہے حجاب رخ ناز سے بہت

آنکھیں ملیں تو ہوش نہ آیا کسی طرح

جس حال میں ہوئی تھی محبت کی ابتدا

ماحول وہ نہ لوٹ کر آیا کسی طرح

باقی ہے دل میں شعلۂ امید کی جھلک

بجھنے میں یہ چراغ نہ آیا کسی طرح

ہم نے تو بندگی میں محبت خرید لی

تم نے بھی کوئی قول نبھایا کسی طرح

قید قفس میں منظر گلشن تو ہے مدام

اک آشیاں ہی راس نہ آیا کسی طرح

خلوت کی بزم ہی میں رہا شادؔ باخبر

شہرت کو راہبر نہ بنایا کسی طرح