روٹھنا تیرا سر شام برا لگتا ہے

روٹھنا تیرا سر شام برا لگتا ہے

شب کو پھر چاند لب بام برا لگتا ہے

نام لے لے کے میں جیتا ہوں جہاں میں جس کا

جانے کیوں اس کو مرا نام برا لگتا ہے

غم بھی مل جائے اگر ان کا تو قسمت بن جائے

عشق میں کس کو یہ انعام برا لگتا ہے

آدمی اوروں کو بدنام کرے جی بھر کے

اپنا جب نام ہو بدنام برا لگتا ہے

ہو سفر ایسا کہ محبوب ہو منزل جس کی

عشق والوں کو تب آرام برا لگتا ہے

جب سے دیکھی ہیں تری مست شرابی آنکھیں

نشۂ بادۂ گلفام برا لگتا ہے

ہو برے کام سے جو دولت و شہرت حاصل

پھر ملکؔ کس کو برا کام برا لگتا ہے