sa’at-e-hijr kaT gai ishq jawan ho gaya

sā’at-e-hijr kaT ga.ī 'ishq javān ho gayā

shahr meñ 'arse baa'd phir amn-o-amān ho gayā

jis ke baġhair ziist kā zehn meñ ḳhāka tak na thā

kaise vo shaḳhs yak-ba-yak vahm-o-gumān ho gayā

dil ke mu’āmalāt kī ham ko bhī thoḌī fahm hai

kyā kaheñ dosto yahāñ jaañ kā ziyān ho gayā

ham ko bhī faḳhr hai ki ham rakhte the apne sar pe chhat

koī makāñ milā na thā dard makān ho gayā

ek na.e safar pe ab honā hai ham ko gāmzan

paañv bhī laḌkhaḌā uThe rasta Dhalān ho gayā

sa’at-e-hijr kaT gai 'ishq jawan ho gaya

shahr mein 'arse ba'd phir amn-o-aman ho gaya

jis ke baghair zist ka zehn mein KHaka tak na tha

kaise wo shaKHs yak-ba-yak wahm-o-guman ho gaya

dil ke mu’amalat ki hum ko bhi thoDi fahm hai

kya kahen dosto yahan jaan ka ziyan ho gaya

hum ko bhi faKHr hai ki hum rakhte the apne sar pe chhat

koi makan mila na tha dard makan ho gaya

ek nae safar pe ab hona hai hum ko gamzan

panw bhi laDkhaDa uThe rasta Dhalan ho gaya