saat-e-asudgi dekhe hue arsa hua

sā.at-e-āsūdgī dekhe hue arsa huā

muflisī ko mere ghar Thahre hue arsa huā

lamha-e-rāhat-rasā dekhe hue arsa huā

maañ tire shāne pe sar rakkhe hue arsa huā

hijr kī tārīkiyoñ kā silsila hai duur tak

chāndnī ko chāñd se bichhḌe hue arsa huā

zindagī be-ḳhvāb lamhoñ meñ simaT kar rah ga.ī

hijr meñ tere palak jhapke hue arsa huā

ḳhauf se sahmā huā hai dil parinda aaj bhī

sar se sailāb-e-alam guzre hue arsa huā

dil ko rahtā hai musalsal muntashir hone kā ḳhauf

yaanī andar se mujhe TuuTe hue arsa huā

kārobār-e-zīst meñ kuchh is qadar uljhā ki bas

tere baare meñ bhī kuchh soche hue arsa huā

ai hujūm-e-ārzū ab chāhtā huuñ taḳhliya

ḳhāna-e-dil meñ tujhe rahte hue arsa huā

maiñ kahāñ huuñ kaun sī manzil meñ huuñ koī batā.e

mujh ko apnī khoj meñ nikle hue arsa huā

dushmanī gum ho ga.ī hai dostoñ kī bhiiḌ meñ

chehra haa.e dushmanāñ dekhe hue arsa huā

jā tū apnī raah le ab ai dil-e-ishrat-talab

pehlū-e-'shahbāz' meñ baiThe hue arsa huā

saat-e-asudgi dekhe hue arsa hua

muflisi ko mere ghar Thahre hue arsa hua

lamha-e-rahat-rasa dekhe hue arsa hua

man tere shane pe sar rakkhe hue arsa hua

hijr ki tarikiyon ka silsila hai dur tak

chandni ko chand se bichhDe hue arsa hua

zindagi be-KHwab lamhon mein simaT kar rah gai

hijr mein tere palak jhapke hue arsa hua

KHauf se sahma hua hai dil parinda aaj bhi

sar se sailab-e-alam guzre hue arsa hua

dil ko rahta hai musalsal muntashir hone ka KHauf

yani andar se mujhe TuTe hue arsa hua

karobar-e-zist mein kuchh is qadar uljha ki bas

tere bare mein bhi kuchh soche hue arsa hua

ai hujum-e-arzu ab chahta hun taKHliya

KHana-e-dil mein tujhe rahte hue arsa hua

main kahan hun kaun si manzil mein hun koi batae

mujh ko apni khoj mein nikle hue arsa hua

dushmani gum ho gai hai doston ki bhiD mein

chehra hae dushmanan dekhe hue arsa hua

ja tu apni rah le ab ai dil-e-ishrat-talab

pehlu-e-'shahbaz' mein baiThe hue arsa hua