ساعت مرگ مسلسل ہر نفس بھاری ہوئی

ساعت مرگ مسلسل ہر نفس بھاری ہوئی

پھر فضائے جاں پہ صدیوں کی تھکن طاری ہوئی

خانماں برباد یادیں دستکیں دینے لگیں

جب کبھی اپنی طرف بڑھنے کی تیاری ہوئی

اس نے اپنے آپ کو ہم پر منور کر دیا

پھر بھی چشم شوق میں روشن نہ چنگاری ہوئی

اب کسی کی بھی نظر اٹھتی نہیں سوئے فلک

ہم زمیں والوں کو آخر کیسی بیماری ہوئی

وقت کی دلدل میں خوش آہنگ لمحے دھنس گئے

یعنی ہر ساعت سکوت شب کی ہے ماری ہوئی

اس طرح بے کیف موسم تو کبھی گزرا نہ تھا

پھول ہی برسے نہ تو اب کے شررباری ہوئی

اب دیار دل میں اخترؔ ہو کا عالم بھی نہیں

کس اذیت ناک موسم سے مری یاری ہوئی