ساعت زیر و زبر کے درمیاں کوئی تو ہے
ساعت زیر و زبر کے درمیاں کوئی تو ہے
سن پس ادراک پیش آسماں کوئی تو ہے
میں خود اپنے باب میں رہتی ہوں محو جستجو
ہم رکاب وحشت ریگ رواں کوئی تو ہے
اجنبی ہیں ساری آوازیں سرائے دہر میں
پھر بھی یوں لگتا ہے میرا ہم زباں کوئی تو ہے
ہیں سبھی بنجر خیال و خواب کی زیبائیاں
ہاں بس اتنا ہے کہ زیب داستاں کوئی تو ہے
رقص فرمائیں رگوں میں عشق کی چنگاریاں
کہہ اٹھے یعنی طلب شعلہ بجاں کوئی تو ہے
بے ستوں افلاک بے بنیاد رقصاں ہے زمیں
تھام رکھا ہے کسی نے یہ جہاں کوئی تو ہے
ایک نقش یاد یار اک پرتو حسن فریب
میری بزم آرائیوں کا رازداں کوئی تو ہے
بر سر ہجراں بھی وابستہ ہے امید وصال
ہم سا شہر آرزو میں خوش گماں کوئی تو ہے
رہ نورد عشق ہے غم آشنائے اضطراب
اس دیار جستجو میں ضو فشاں کوئی تو ہے
وسعتیں انجمؔ فرومانده ہیں جس کے باب میں
ماورائے کل مکاں و لا مکاں کوئی تو ہے
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
