saat-e-zer-o-zabar ke darmiyan koi to hai

sā.at-e-zer-o-zabar ke darmiyāñ koī to hai

sun pas-e-idrāk pesh-e-āsmāñ koī to hai

maiñ ḳhud apne baab meñ rahtī huuñ mahv-e-justujū

ham-rikāb-e-vahshat-e-reg-e-ravāñ koī to hai

ajnabī haiñ saarī āvāzeñ sarā-e-dahr meñ

phir bhī yuuñ lagtā hai merā ham-zabāñ koī to hai

haiñ sabhī banjar ḳhayāl-o-ḳhvāb kī zebā.iyāñ

haañ bas itnā hai ki zeb-e-dāstāñ koī to hai

raqs farmā.eñ ragoñ meñ ishq kī chiñgāriyāñ

kah uThe ya.anī talab sho.ala-ba-jāñ koī to hai

be-sutūñ aflāk be-buniyād raqsāñ hai zamīñ

thaam rakkhā hai kisī ne ye jahāñ koī to hai

ek naqsh-e-yād-e-yār ik partav-e-husn-e-fareb

merī bazm-ārā.iyoñ kā rāz-dāñ koī to hai

bar-sar-e-hijrāñ bhī vābasta hai ummīd-e-visāl

ham sā shahr-e-ārzū meñ ḳhush-gumāñ koī to hai

rah-navard-e-ishq hai ġham āshnā-e-iztirāb

is dayār-e-justujū meñ zau-fishāñ koī to hai

vus.ateñ 'anjum' faromānda haiñ jis ke baab meñ

māvarā-e-kul makāñ-o-lā-makāñ koī to hai

saat-e-zer-o-zabar ke darmiyan koi to hai

sun pas-e-idrak pesh-e-asman koi to hai

main KHud apne bab mein rahti hun mahw-e-justuju

ham-rikab-e-wahshat-e-reg-e-rawan koi to hai

ajnabi hain sari aawazen sara-e-dahr mein

phir bhi yun lagta hai mera ham-zaban koi to hai

hain sabhi banjar KHayal-o-KHwab ki zebaiyan

han bas itna hai ki zeb-e-dastan koi to hai

raqs farmaen ragon mein ishq ki chingariyan

kah uThe yani talab shoala-ba-jaan koi to hai

be-sutun aflak be-buniyaad raqsan hai zamin

tham rakkha hai kisi ne ye jahan koi to hai

ek naqsh-e-yaad-e-yar ek partaw-e-husn-e-fareb

meri bazm-araiyon ka raaz-dan koi to hai

bar-sar-e-hijran bhi wabasta hai ummid-e-visal

hum sa shahr-e-arzu mein KHush-guman koi to hai

rah-naward-e-ishq hai gham aashna-e-iztirab

is dayar-e-justuju mein zau-fishan koi to hai

wusaten 'anjum' faromanda hain jis ke bab mein

mawara-e-kul makan-o-la-makan koi to hai