sabir-o-shakir rahe shadan rahe

sābir-o-shākir rahe shādāñ rahe

ḳhush rahe jis haal meñ insāñ rahe

tum ko ā.īne meñ kyā aayā nazar

misl-e-ā.īna jo tum hairāñ rahe

us mohabbat kā burā ho ishq meñ

chaar din bhī to na ham shādāñ rahe

the vo husn-o-'ishq ke rāz-o-niyāz

qaid zindāñ meñ mah-e-kan.āñ rahe

tum nahīñ ho to tumhārī yaad hai

ḳhāna-e-dil kis liye vīrāñ rahe

qatl kar ke ham ko vahīñ munfa.il

aur ham sharminda-e-ehsāñ rahe

mai se tauba us ghaTā meñ mohtasib

kyuuñ farishta ban ke har insāñ rahe

khil ke kaliyāñ de rahī haiñ ye sabaq

aadmī kāñToñ meñ bhī ḳhandāñ rahe

baaġh meñ do din ko aa.ī hai bahār

misl-e-shabnam koī kyuuñ giryāñ rahe

mere siine meñ jo the ulfat ke daaġh

roz-e-raushan kī tarah tābāñ rahe

kyā haram kyā dair haiñ jhagḌoñ ke ghar

un se 'shankar' duur hī insāñ rahe

sabir-o-shakir rahe shadan rahe

KHush rahe jis haal mein insan rahe

tum ko aaine mein kya aaya nazar

misl-e-aina jo tum hairan rahe

us mohabbat ka bura ho ishq mein

chaar din bhi to na hum shadan rahe

the wo husn-o-'ishq ke raaz-o-niyaz

qaid zindan mein mah-e-kanan rahe

tum nahin ho to tumhaari yaad hai

KHana-e-dil kis liye viran rahe

qatl kar ke hum ko wahin munfail

aur hum sharminda-e-ehsan rahe

mai se tauba us ghaTa mein mohtasib

kyun farishta ban ke har insan rahe

khil ke kaliyan de rahi hain ye sabaq

aadmi kanTon mein bhi KHandan rahe

bagh mein do din ko aai hai bahaar

misl-e-shabnam koi kyun giryan rahe

mere sine mein jo the ulfat ke dagh

roz-e-raushan ki tarah taban rahe

kya haram kya dair hain jhagDon ke ghar

un se 'shankar' dur hi insan rahe