sadgi to hamari zara dekhiye eatibar aap ke wade par kar liya

sādgī to hamārī zarā dekhiye e.atibār aap ke va.ade par kar liyā

baat to sirf ik raat kī thī magar intizār aap kā umr-bhar kar liyā

ishq meñ uljhaneñ pahle hī kam na thiiñ aur paidā nayā dard-e-sar kar liyā

log Darte haiñ qātil kī parchhā.īñ se ham ne qātil ke dil meñ bhī ghar kar liyā

zikr ik bevafā aur sitamgar kā thā aap kā aisī bātoñ se kyā vāsta

aap to bevafā aur sitamgar nahīñ aap ne kis liye muñh udhar kar liyā

zindagī-bhar ke shikve gile the bahut vaqt itnā kahāñ thā ki dohrāte ham

ek hichkī meñ kah Daalī sab dāstāñ ham ne qisse ko yuuñ muḳhtasar kar liyā

be-qarārī milegī mujhe na sukūñ chain chhin jā.egā niiñd uḌ jā.egī

apnā anjām sab ham ko ma.alūm thā aap ne dil kā saudā magar kar liyā

zindagī ke safar meñ bahut duur tak jab koī dost aaya na ham ko nazar

ham ne ghabrā ke tanhā.iyoñ se 'sabā' ek dushman ko ḳhud ham-safar kar liyā

sadgi to hamari zara dekhiye eatibar aap ke wade par kar liya

baat to sirf ek raat ki thi magar intizar aap ka umr-bhar kar liya

ishq mein uljhanen pahle hi kam na thin aur paida naya dard-e-sar kar liya

log Darte hain qatil ki parchhain se hum ne qatil ke dil mein bhi ghar kar liya

zikr ek bewafa aur sitamgar ka tha aap ka aisi baaton se kya wasta

aap to bewafa aur sitamgar nahin aap ne kis liye munh udhar kar liya

zindagi-bhar ke shikwe gile the bahut waqt itna kahan tha ki dohraate hum

ek hichki mein kah Dali sab dastan hum ne qisse ko yun muKHtasar kar liya

be-qarari milegi mujhe na sukun chain chhin jaega nind uD jaegi

apna anjam sab hum ko malum tha aap ne dil ka sauda magar kar liya

zindagi ke safar mein bahut dur tak jab koi dost aaya na hum ko nazar

hum ne ghabra ke tanhaiyon se 'saba' ek dushman ko KHud ham-safar kar liya