sae ke haq mein kuchh nahin mere bayan mein

saa.e ke haq meñ kuchh nahīñ mere bayān meñ

jo aap chhuptā phirtā hai har sā.ebān meñ

ye chhoTe chhoTe shauq bhī us ko ravā nahīñ

jis ko baḌā banāyā gayā ḳhāndān meñ

mujh ko hai aadmī se tavaqqo ḳhulūs kī

sonā talāsh kartā huuñ miTTī kī kaan meñ

qad se nahīñ banā.ī hai pahchān jast se

ye farq hai hamārī tumhārī uThān meñ

miTTī meñ milne vaale haiñ kal us ke chīthḌe

uḌtī rahe patañg bhale āsmān meñ

chup rah sake jo aadmī chup ke maqām par

ye ḳhāmushī ho zumra-e-fauq-ul-bayān meñ

ab tak hameñ ḳhabar hī nahīñ thī kamāl hai

nikle haiñ ham bhī aap ke dil-dādgān meñ

fitrat se kachche-pakke ta.alluq kī baat kyā

miTTī kī baas tak nahīñ pakke makān meñ

sae ke haq mein kuchh nahin mere bayan mein

jo aap chhupta phirta hai har saeban mein

ye chhoTe chhoTe shauq bhi us ko rawa nahin

jis ko baDa banaya gaya KHandan mein

mujh ko hai aadmi se tawaqqo KHulus ki

sona talash karta hun miTTi ki kan mein

qad se nahin banai hai pahchan jast se

ye farq hai hamari tumhaari uThan mein

miTTi mein milne wale hain kal us ke chithDe

uDti rahe patang bhale aasman mein

chup rah sake jo aadmi chup ke maqam par

ye KHamushi ho zumra-e-fauq-ul-bayan mein

ab tak hamein KHabar hi nahin thi kamal hai

nikle hain hum bhi aap ke dil-dadgan mein

fitrat se kachche-pakke talluq ki baat kya

miTTi ki bas tak nahin pakke makan mein