sae ki ummid thi tarikiyan phaila gaya

saa.e kī ummīd thī tārīkiyāñ phailā gayā

jo shajar phūTā zamīñ se biij hī ko khā gayā

kyā gila tujh se ki gulshan kā muqaddar hai yahī

abr ghir kar jab bhī aayā aag hī barsā gayā

ab kināroñ se na māñge qatre qatre kā hisāb

kyuuñ samundar kī taraf bahtā huā dariyā gayā

merī sairābī bhī merī tishnagī se kam na thī

maiñ misāl-e-abr aayā sūrat-e-sahrā gayā

husn ke hamrāh chaltā thā julūsi-e-tishnagāñ

ishq tanhā dahr meñ aayā thā aur tanhā gayā

'mohsin'-ehsāñ kisī bādal kā TukḌā hai ki jo

ek lamhe ke liye aayā ghirā barsā gayā

sae ki ummid thi tarikiyan phaila gaya

jo shajar phuTa zamin se bij hi ko kha gaya

kya gila tujh se ki gulshan ka muqaddar hai yahi

abr ghir kar jab bhi aaya aag hi barsa gaya

ab kinaron se na mange qatre qatre ka hisab

kyun samundar ki taraf bahta hua dariya gaya

meri sairabi bhi meri tishnagi se kam na thi

main misal-e-abr aaya surat-e-sahra gaya

husn ke hamrah chalta tha julusi-e-tishnagan

ishq tanha dahr mein aaya tha aur tanha gaya

'mohsin'-ehsan kisi baadal ka TukDa hai ki jo

ek lamhe ke liye aaya ghira barsa gaya