ساغر دل کیف و مستی سے لبالب بھر گیا

ساغر دل کیف و مستی سے لبالب بھر گیا

کس کا اعجاز نظر سرشار و بے خود کر گیا

ان کے دامن سے ہوئی کچھ اس قدر وابستگی

غنچۂ دل کھل گیا پھولوں سے دامن بھر گیا

ہم تعاقب بھی نہ کر پائے کہاں کی ہمرہی

گرد ہی آئی نظر جس راہ سے رہبر گیا

بے خطا ہونے پہ بھی الزام اپنے سر رہے

کون جانے جور کا الزام کس کے سر گیا

خوف کچھ ایسا بڑھایا ظلمت احساس نے

اور تو اور اکثر اپنے سائے سے دل ڈر گیا

منحصر ذوق نظر پر ہے نظاروں کی بساط

جس طرف اٹھی نگاہیں اس طرف منظر گیا

اس کے نقش و عکس کی پرچھائیاں دیکھا کئے

توڑ کر رشتے دلوں کے جو کنارا کر گیا

زعم تھا جس کو رشیؔ حسن ادائے ناز پر

آئنہ دیکھا تو اپنی ہی نظر سے ڈر گیا