saghar-e-sifalin ko jam-e-jam banaya hai

sāġhar-e-sifālīñ ko jām-e-jam banāyā hai

phail kar mire dil ne ''maiñ'' ko ''ham'' banāyā hai

ham-safar banāyā hai ham-qadam banāyā hai

vaqt ne mujhe kitnā mohtaram banāyā hai

naaz hai ḳhalīlī ko husn-e-naqsh-e-sānī par

garche āzarī hī ne ye sanam banāyā hai

be-kasī-e-dil apnī duur kī hai yuuñ maiñ ne

dūsroñ ke ġham ko bhī apnā ġham banāyā hai

zindagī kī mausīqī kyā hai ham samajhte haiñ

saaz ke talavvun ko zer-o-bam banāyā hai

zulf kī tarah is ko bas sañvārte rahiye

zindagī ko fitrat ne ḳham-ba-ḳham banāyā hai

maiñ ne zarre zarre ko muskurāhaTeñ dī haiñ

tum ne har sitāre ko chashm-e-nam banāyā hai

mudda.ī-e-jiddat hai terī fikr ai zāhid!

mai-kade kī īñToñ se kyuuñ iram banāyā hai

but hazāroñ toḌe haiñ kitne TukḌe joḌe haiñ

zindagī ne jab jā kar ik sanam banāyā hai

saghar-e-sifalin ko jam-e-jam banaya hai

phail kar mere dil ne main ko ham banaya hai

ham-safar banaya hai ham-qadam banaya hai

waqt ne mujhe kitna mohtaram banaya hai

naz hai KHalili ko husn-e-naqsh-e-sani par

garche aazari hi ne ye sanam banaya hai

be-kasi-e-dil apni dur ki hai yun main ne

dusron ke gham ko bhi apna gham banaya hai

zindagi ki mausiqi kya hai hum samajhte hain

saz ke talawwun ko zer-o-bam banaya hai

zulf ki tarah is ko bas sanwarte rahiye

zindagi ko fitrat ne KHam-ba-KHam banaya hai

main ne zarre zarre ko muskurahaTen di hain

tum ne har sitare ko chashm-e-nam banaya hai

muddai-e-jiddat hai teri fikr ai zahid!

mai-kade ki inTon se kyun iram banaya hai

but hazaron toDe hain kitne TukDe joDe hain

zindagi ne jab ja kar ek sanam banaya hai