sahib-e-taj-e-basirat hun main diwana sahi

sāhib-e-tāj-e-basīrat huuñ maiñ dīvāna sahī

fikr shāhāna hai andāz faqīrāna sahī

zikr-e-ka.aba na sahī qissa-e-but-ḳhāna sahī

husn-e-tafhīm salāmat koī afsāna sahī

mun.akis zehn-o-nazar meñ haiñ ḳhad-o-ḳhāl tire

tujh ko samjhā to bahut hai tujhe dekhā na sahī

sajda pāband-e-ta.ayyun to nahīñ dīvāne

hai agar bāb-e-haram band to but-ḳhāna sahī

hūr-o-kausar ke tasavvur se kahāñ tak bahleñ

nār-e-imroz hī de jannat-e-fardā na sahī

nigah-e-dil ke ravābit se ham-āhañg to hai

merī duniyā tirī duniyā se judāgāna sahī

munfarid phir bhī hai ai husn haqīqat us kī

zindagī ishq kī unvān-e-sad-afsāna sahī

sahib-e-taj-e-basirat hun main diwana sahi

fikr shahana hai andaz faqirana sahi

zikr-e-kaba na sahi qissa-e-but-KHana sahi

husn-e-tafhim salamat koi afsana sahi

munakis zehn-o-nazar mein hain KHad-o-KHal tere

tujh ko samjha to bahut hai tujhe dekha na sahi

sajda paband-e-tayyun to nahin diwane

hai agar bab-e-haram band to but-KHana sahi

hur-o-kausar ke tasawwur se kahan tak bahlen

nar-e-imroz hi de jannat-e-farda na sahi

nigah-e-dil ke rawabit se ham-ahang to hai

meri duniya teri duniya se judagana sahi

munfarid phir bhi hai ai husn haqiqat us ki

zindagi ishq ki unwan-e-sad-afsana sahi