sahil pe ab charagh farozan hue to kya

sāhil pe ab charāġh farozāñ hue to kyā

ġharqāb ham ko kar ke ye sāmāñ hue to kyā

be-rañg-o-bū hai dāman-e-ahl-e-chaman abhī

qatre lahū ke sarf-e-bahārāñ hue to kyā

be-kār hai bahār jo aa.e na vaqt par

gar mere ba.ad aish ke sāmāñ hue to kyā

ham but-kade meñ rah ke bhī īmāñ-parast haiñ

vaa.iz haram meñ rah ke musalmāñ hue to kyā

gar lā-ilāj ho gayā dard-e-dil-e-figār

phir chārasāz mā.il-e-darmāñ hue to kyā

māthe pe to kalañk kā Tiika hai aaj tak

ham ko miTā ke log numāyāñ hue to kyā

ḳhvābīda ab bhī nazreñ haiñ be-his hai ab bhī dil

nā āshnā-e-soz ġhazal-ḳhvāñ hue to kyā

dāman se ḳhuun dil ko banānā thā rashk-e-gul

minnat-kash-e-bahār-e-gulistāñ hue to kyā

'kashfī' miTā sake na magar zulmat-e-nasīb

aañsū hamāre zīnat-e-mizhgāñ hue to kyā

sahil pe ab charagh farozan hue to kya

gharqab hum ko kar ke ye saman hue to kya

be-rang-o-bu hai daman-e-ahl-e-chaman abhi

qatre lahu ke sarf-e-bahaaran hue to kya

be-kar hai bahaar jo aae na waqt par

gar mere baad aish ke saman hue to kya

hum but-kade mein rah ke bhi iman-parast hain

waiz haram mein rah ke musalman hue to kya

gar la-ilaj ho gaya dard-e-dil-e-figar

phir chaarasaz mail-e-darman hue to kya

mathe pe to kalank ka Tika hai aaj tak

hum ko miTa ke log numayan hue to kya

KHwabida ab bhi nazren hain be-his hai ab bhi dil

na aashna-e-soz ghazal-KHwan hue to kya

daman se KHun dil ko banana tha rashk-e-gul

minnat-kash-e-bahaar-e-gulistan hue to kya

'kashfi' miTa sake na magar zulmat-e-nasib

aansu hamare zinat-e-mizhgan hue to kya