ساحل پہ کوئی ڈوب کے ابھرا نہ دوبارا

ساحل پہ کوئی ڈوب کے ابھرا نہ دوبارا

دریا سے بلا خیز ہے گرداب کنارا

ہر شخص کو اب چاہیے دولت کا سہارا

ہم ہیں کہ جو کرتے ہیں محبت پہ گزارا

تڑپا کے تمہیں نے مجھے بیدار کیا ہے

ٹھکرا کے تمہیں نے مجھے چاہت پہ ابھارا

محتاط نگاہوں سے ہر اک پھول کو دیکھوں

ڈرتا ہوں کہ چبھ جائے نہ آنکھوں میں نظارا

دستور زباں بندی کا عالم بھی عجب ہے

کہنی ہو کوئی بات تو کرتے ہیں اشارا

گھر کوئی سلامت ہے نہ سر کوئی سلامت

اے دوست یہی شہر محبت ہے تمہارا

اک روز تو یہ تم کو بتانا ہی پڑے گا

کس جرم کی پاداش میں عرفانؔ کو مارا