sahil pe samundar ke kuchh der Thahar jaun

sāhil pe samundar ke kuchh der Thahar jā.ūñ

mumkin hai ki maujoñ ke māthe pe ubhar jā.ūñ

tapte hue lamhoñ ko sairāb to kar jā.ūñ

ik mauj-e-sadā ban kar sahrā meñ bikhar jā.ūñ

har sañg hai ik shīsha har shīsha hai ik patthar

ai shahr-e-tilism āḳhir Thahrūñ ki guzar jā.ūñ

laao na ujāloñ ko is shahr kī sarhad tak

aisā na ho maiñ apne saa.e se hī Dar jā.ūñ

har samt fazāoñ meñ pathrāv kā aalam hai

shīshe kā badan le kar jā.ūñ to kidhar jā.ūñ

har shaam mire dil meñ detā hai sadā koī

maiñ Dūbte sūraj ke hamrāh na mar jā.ūñ

roke na agar mujh ko is dasht kī tanhā.ī

'ishrat' maiñ havāoñ ke paikar meñ utar jā.ūñ

sahil pe samundar ke kuchh der Thahar jaun

mumkin hai ki maujon ke mathe pe ubhar jaun

tapte hue lamhon ko sairab to kar jaun

ek mauj-e-sada ban kar sahra mein bikhar jaun

har sang hai ek shisha har shisha hai ek patthar

ai shahr-e-tilism aaKHir Thahrun ki guzar jaun

lao na ujalon ko is shahr ki sarhad tak

aisa na ho main apne sae se hi Dar jaun

har samt fazaon mein pathraw ka aalam hai

shishe ka badan le kar jaun to kidhar jaun

har sham mere dil mein deta hai sada koi

main Dubte suraj ke hamrah na mar jaun

roke na agar mujh ko is dasht ki tanhai

'ishrat' main hawaon ke paikar mein utar jaun