sahil se uTha hai na samundar se uTha hai

sāhil se uThā hai na samundar se uThā hai

jo shor mirī zaat ke andar se uThā hai

dariyā-e-mohabbat ke kināre kabhī koī

Duubā hai jo ik baar muqaddar se uThā hai

vo aa.e to is ḳhvāb ko ta.abīr milegī

jo ḳhvāb-e-jazīra mire sāgar se uThā hai

maiñ apne rag-o-pai meñ use DhūñD rahī huuñ

jo shaḳhs abhī mere barābar se uThā hai

raqsāñ hai mirī aañkh meñ ehsās kī mānind

manzar jo tirī aañkh ke manzar se uThā hai

phūloñ ko tire rañg ne baḳhshī hai kahānī

ḳhushbū kā fasāna tire paikar se uThā hai

is shahr-e-mohabbat meñ vo ruktā hī nahīñ hai

jo shor tire pyaar ke mehvar se uThā hai

ye us kā ravayya ye anā ye lab-o-lahja

in sab ke sabab amn-o-sukūñ ghar se uThā hai

mehr-o-mah-o-anjum meñ use DhūñDne vaalo

ye saarā jahāñ ḳhaak ke paikar se uThā hai

rahtā hai mirī aañkh meñ kājal kī tarah se

jo duur tamannāoñ ke tevar se uThā hai

maiñ dar se tire uTh ke isī soch meñ gum huuñ

kyā koī ḳhushī se bhī tire dar se uThā hai

jo us kī nazar se kabhī 'afroz' uThā thā

is baar vo mahshar mire andar se uThā hai

sahil se uTha hai na samundar se uTha hai

jo shor meri zat ke andar se uTha hai

dariya-e-mohabbat ke kinare kabhi koi

Duba hai jo ek bar muqaddar se uTha hai

wo aae to is KHwab ko tabir milegi

jo KHwab-e-jazira mere sagar se uTha hai

main apne rag-o-pai mein use DhunD rahi hun

jo shaKHs abhi mere barabar se uTha hai

raqsan hai meri aankh mein ehsas ki manind

manzar jo teri aankh ke manzar se uTha hai

phulon ko tere rang ne baKHshi hai kahani

KHushbu ka fasana tere paikar se uTha hai

is shahr-e-mohabbat mein wo rukta hi nahin hai

jo shor tere pyar ke mehwar se uTha hai

ye us ka rawayya ye ana ye lab-o-lahja

in sab ke sabab amn-o-sukun ghar se uTha hai

mehr-o-mah-o-anjum mein use DhunDne walo

ye sara jahan KHak ke paikar se uTha hai

rahta hai meri aankh mein kajal ki tarah se

jo dur tamannaon ke tewar se uTha hai

main dar se tere uTh ke isi soch mein gum hun

kya koi KHushi se bhi tere dar se uTha hai

jo us ki nazar se kabhi 'afroz' uTha tha

is bar wo mahshar mere andar se uTha hai