sahilon se dur jis din kashtiyan rah jaengi

sāhiloñ se duur jis din kashtiyāñ rah jā.eñgī

chaar jānib ḳhālī ḳhālī bastiyāñ rah jā.eñgī

phir samundar meñ utar jā.egā paanī buuñd buuñd

jaal meñ dam toḌtī kuchh machhliyāñ rah jā.eñgī

ye tavānā jism thak kar ek din gir jā.egā

khaal ke andar phaḌaktī pasliyāñ rah jā.eñgī

bāġhbānoñ kā chaman yūñhī rahā to ek din

baaġh kī pahchān bas do titliyāñ rah jā.eñgī

maiñ na kahtā thā ki dil kī baat kahne ke liye

khokhle alfāz kī baisākhiyāñ rah jā.eñgī

yuuñ agar ghaTte rahe insāñ to 'ḳhālid' dekhnā

is zamīñ par bas ḳhudā kī bastiyāñ rah jā.eñgī

sahilon se dur jis din kashtiyan rah jaengi

chaar jaanib KHali KHali bastiyan rah jaengi

phir samundar mein utar jaega pani bund bund

jal mein dam toDti kuchh machhliyan rah jaengi

ye tawana jism thak kar ek din gir jaega

khaal ke andar phaDakti pasliyan rah jaengi

baghbanon ka chaman yunhi raha to ek din

bagh ki pahchan bas do titliyan rah jaengi

main na kahta tha ki dil ki baat kahne ke liye

khokhle alfaz ki baisakhiyan rah jaengi

yun agar ghaTte rahe insan to 'KHalid' dekhna

is zamin par bas KHuda ki bastiyan rah jaengi