سائل وقت ہیں دامان کرم دیکھیں گے

سائل وقت ہیں دامان کرم دیکھیں گے

ہم ترے دست تصرف کا بھرم دیکھیں گے

حادثے کتنے مقابل ہیں یہ ہم دیکھیں گے

اور کب تک ہے یہ طوفان میں دم دیکھیں گے

سرفروشان وفا ہم تو ازل سے ہیں مگر

کتنی خوں ریز ہے یہ تیغ ستم دیکھیں گے

ہم نے راہوں کو اجالے تو دئے دور خرد

کتنے روشن ہیں ترے نقش قدم دیکھیں گے

ذکر جب اپنے ہر اک زخم وفا کا ہوگا

گل فشانی بھی سر لوح و قلم دیکھیں گے

زندگی خواب سہی تیری تمنا پھر بھی

عمر بھر تیرے تصور کے صنم دیکھیں گے

جانے کس موڑ پہ لے آیا ہمیں کرب حیات

اب نہ وہ زلف نہ وہ زلف کے خم دیکھیں گے

پیار ہمدردی وفا مہر و مروت اخلاق

جو بھی دیکھیں گے اب اس دور میں کم دیکھیں گے

اپنے ہی خوں سے چمک اٹھے گی تاریخ کلیمؔ

عہد حاضر کے جو ماتھے پہ رقم دیکھیں گے