sakit hai badan KHwab ki lazzat se guzar kar

sākit hai badan ḳhvāb kī lazzat se guzar kar

hairat meñ hai dil kūcha-e-hairat se guzar kar

ik naḳhl-e-shanāsā.ī meñ ruknā paḌā tā-der

paayā use phir dasht-e-vazāhat se guzar kar

shamshīr duā karke musalle se uThā.ī

phir jang pe niklā maiñ ibādat se guzar kar

ik zaḳhm ke andar bhī to hotā hai kahīñ zaḳhm

bhartā jo nahīñ kār-e-jarāhat se guzar kar

ik qaid-e-musalsal hai ki har din mirī tanhā.ī

kamre meñ chalī aatī hai ḳhilqat se guzar kar

dushman ke ta.āqub meñ thī mushkil baḌī darpesh

jaanā thā mujhe māl-e-ġhanīmat se guzar kar

manzar pas-e-manzar meñ chhupā hai kahīñ uryāñ

tasvīr meñ parde kī ri.āyat se guzar kar

maiñ niiñd meñ chal kar hī uThā lā.ūñgā mahtāb

is ḳhvāb kī bosīda imārat se guzar kar

thā kār-e-zarūrat bhī girāñ kār-e-junūñ par

ma.alūm huā ranj-e-ma.īshat se guzar kar

maiñ der se pahuñchā thā so bāloñ meñ lagā phuul

murjhā hī gayā lams kī hasrat se guzar kar

us shoḳh se nādim hai mirī tāqat-e-guftār

har lafz adā hotā hai luknat se guzar kar

sakit hai badan KHwab ki lazzat se guzar kar

hairat mein hai dil kucha-e-hairat se guzar kar

ek naKHl-e-shanasai mein rukna paDa ta-der

paya use phir dasht-e-wazahat se guzar kar

shamshir dua karke musalle se uThai

phir jang pe nikla main ibaadat se guzar kar

ek zaKHm ke andar bhi to hota hai kahin zaKHm

bharta jo nahin kar-e-jarahat se guzar kar

ek qaid-e-musalsal hai ki har din meri tanhai

kamre mein chali aati hai KHilqat se guzar kar

dushman ke taaqub mein thi mushkil baDi darpesh

jaana tha mujhe mal-e-ghanimat se guzar kar

manzar pas-e-manzar mein chhupa hai kahin uryan

taswir mein parde ki riayat se guzar kar

main nind mein chal kar hi uTha launga mahtab

is KHwab ki bosida imarat se guzar kar

tha kar-e-zarurat bhi giran kar-e-junun par

malum hua ranj-e-maishat se guzar kar

main der se pahuncha tha so baalon mein laga phul

murjha hi gaya lams ki hasrat se guzar kar

us shoKH se nadim hai meri taqat-e-guftar

har lafz ada hota hai luknat se guzar kar