سامان اہتمام چراغاں ابھی نہیں

سامان اہتمام چراغاں ابھی نہیں

محفوظ بجلیوں سے گلستاں ابھی نہیں

میرا نصیب ہیں غم دوراں کی تلخیاں

میرے نصیب میں غم جاناں ابھی نہیں

کہتے ہیں لب کہ چھیڑ فسانے بہار کے

کہتی ہے آنکھ ذکر بہاراں ابھی نہیں

اب تک خزاں رسیدہ ہے صبح بہار نو

آسودۂ بہار گلستاں ابھی نہیں

ہر لب پہ ہے نظارۂ ساحل کی گفتگو

دل رازدار لذت طوفاں ابھی نہیں

گو صبح ہو چکی ہے اندھیرا ہنوز ہے

کچھ اعتبار صبح درخشاں ابھی نہیں

فاروقؔ کوئی حسن چراغاں منائے کیا

دل بے نیاز باد شہیداں ابھی نہیں