saman to behad hai dil mein

sāmāñ to behad hai dil meñ

sab kuchh kār-āmad hai dil meñ

aap kabhī tashrīf to laa.eñ

ik aalī masnad hai dil meñ

bā-e-bismillāh kholegī

jo qufl-e-abjad hai dil meñ

ishq kī ausat kam nahīñ hotī

aaj bhī sad-fī-sad hai dil meñ

koī bahs na koī hujjat

tū be-radd-o-kad hai dil meñ

taktā rahtā huuñ sahrā se

ek harā gumbad hai dil meñ

ishq ho jaise jaan kī baazī

aisī shadd-o-mad hai dil meñ

us ghar kī vus.at kyā kahnā

tum jaisā ḳhush-qad hai dil meñ

ye jannat bhī hai dozaḳh bhī

nek hai dil meñ bad hai dil meñ

be-lausī se aa.e ho sach-much

yā koī maqsad hai dil meñ

sar pe zarūrī kaam paḌe haiñ

aur aamad aamad hai dil meñ

ham jaate haiñ fātiha paḌhne

purkhoñ kā mash.had hai dil meñ

kyuuñ khiñchte haiñ 'shu.ūr' aap āḳhir

kyā ham se kuchh kad hai dil meñ

saman to behad hai dil mein

sab kuchh kar-amad hai dil mein

aap kabhi tashrif to laen

ek aali masnad hai dil mein

ba-e-bismillah kholegi

jo qufl-e-abjad hai dil mein

ishq ki ausat kam nahin hoti

aaj bhi sad-fi-sad hai dil mein

koi bahs na koi hujjat

tu be-radd-o-kad hai dil mein

takta rahta hun sahra se

ek hara gumbad hai dil mein

ishq ho jaise jaan ki bazi

aisi shadd-o-mad hai dil mein

us ghar ki wusat kya kahna

tum jaisa KHush-qad hai dil mein

ye jannat bhi hai dozaKH bhi

nek hai dil mein bad hai dil mein

be-lausi se aae ho sach-much

ya koi maqsad hai dil mein

sar pe zaruri kaam paDe hain

aur aamad aamad hai dil mein

hum jate hain fatiha paDhne

purkhon ka mashhad hai dil mein

kyun khinchte hain 'shuur' aap aaKHir

kya hum se kuchh kad hai dil mein