saman wo rakkha hai qarine se hamara

sāmān vo rakkhā hai qarīne se hamārā

ab kuuch zarūrī hai madīne se hamārā

us ne hameñ tārīḳh ke tah-ḳhāne meñ rakkhā

so rizq utartā rahā ziine se hamārā

ik yaad ke naqshe pe khañDar khod rahe haiñ

ik ḳhvāb nikalnā hai dafīne se hamārā

jis din se vo bichhḌā hai siye jaate haiñ siina

jī bhartā nahīñ siine ke siine se hamārā

bardāsht kiye jaa.eñ tire 'ahd-e-sitam ko

aisā bhī ta'alluq nahīñ jiine se hamārā

lagtā hai tirī Dor kahīñ aur bañdhī hai

jo rābta TuuTā hai mahīne se hamārā

ye bojh nahīñ bojh uThāne ke liye hai

mat haath haTānā kabhī siine se hamārā

hairān take jaate haiñ ham yāroñ ke chehre

paḌtā hai 'ajab vāsta kiine se hamārā

vo aañkh uThe yā na uThe apnī balā se

ab rabt bahut ḳhaas hai piine se hamārā

saman wo rakkha hai qarine se hamara

ab kuch zaruri hai madine se hamara

us ne hamein tariKH ke tah-KHane mein rakkha

so rizq utarta raha zine se hamara

ek yaad ke naqshe pe khanDar khod rahe hain

ek KHwab nikalna hai dafine se hamara

jis din se wo bichhDa hai siye jate hain sina

ji bharta nahin sine ke sine se hamara

bardasht kiye jaen tere 'ahd-e-sitam ko

aisa bhi ta'alluq nahin jine se hamara

lagta hai teri Dor kahin aur bandhi hai

jo rabta TuTa hai mahine se hamara

ye bojh nahin bojh uThane ke liye hai

mat hath haTana kabhi sine se hamara

hairan take jate hain hum yaron ke chehre

paDta hai 'ajab wasta kine se hamara

wo aankh uThe ya na uThe apni bala se

ab rabt bahut KHas hai pine se hamara