samne aankhon ke raqsan tha tamasha dusra

sāmne āñkhoñ ke raqsāñ thā tamāshā dūsrā

aur manzar maiñ ne duniyā ko dikhāyā dūsrā

lamha-e-fursat mile to ġhaur karnā chāhiye

bām-o-dar kis ke chaman meñ kaun aayā dūsrā

raqs-e-āseb-e-fanā jaarī yahāñ jab se huā

DhūñDhtī haiñ ab havā.eñ bhī Thikāna dūsrā

ḳhud shanāsī ke marāhil tai na ho paa.e agar

maiñ bhī ho jā.ūñgā shāyad rafta rafta dūsrā

ab ḳhushī se ham chaleñ is par ki jabrī taur par

sāmne apne rahā kab koī rasta dūsrā

ik piyāle meñ thā amrit dūsre meñ zahr thā

soch kar maiñ ne uThāyā hai piyāla dūsrā

maiñ ki phūloñ kī zabāñ meñ baat kartā thā 'nasīm'

shahr ke hālāt ne baḳhshā hai lahja dūsrā

samne aankhon ke raqsan tha tamasha dusra

aur manzar main ne duniya ko dikhaya dusra

lamha-e-fursat mile to ghaur karna chahiye

baam-o-dar kis ke chaman mein kaun aaya dusra

raqs-e-aseb-e-fana jari yahan jab se hua

DhunDhti hain ab hawaen bhi Thikana dusra

KHud shanasi ke marahil tai na ho pae agar

main bhi ho jaunga shayad rafta rafta dusra

ab KHushi se hum chalen is par ki jabri taur par

samne apne raha kab koi rasta dusra

ek piyale mein tha amrit dusre mein zahr tha

soch kar main ne uThaya hai piyala dusra

main ki phulon ki zaban mein baat karta tha 'nasim'

shahr ke haalat ne baKHsha hai lahja dusra