samne hote the pahle jis qadar hote the hum

sāmne hote the pahle jis qadar hote the ham

jab ye nazzāre nahīñ the tab nazar hote the ham

tab nayā miTTī se uTThā thā mohabbat kā ḳhamīr

har kisī kuuze meñ do ik ghūñT bhar hote the ham

jis parī par mar miTe the vo parī-zādī na thī

ba.ad meñ jaanā ki us ke donoñ par hote the ham

tab kisī dīvār se koī ta.āruf thā nahīñ

un dinoñ kī baat hai jab dar-ba-dar hote the ham

sāmne aate the jab to DhūñDte the kashtiyāñ

chaar āñkhoñ se banī ik jhiil par hote the ham

yuuñ banā dete the jaise sher ho jaate haiñ ab

harf-e-kun kā bhī kabhī dast-e-hunar hote the ham

ik ghaḌī aisī bhī aatī thī mulāqātoñ ke biich

tum udhar hote the jis ke aur udhar hote the ham

samne hote the pahle jis qadar hote the hum

jab ye nazzare nahin the tab nazar hote the hum

tab naya miTTi se uTTha tha mohabbat ka KHamir

har kisi kuze mein do ek ghunT bhar hote the hum

jis pari par mar miTe the wo pari-zadi na thi

baad mein jaana ki us ke donon par hote the hum

tab kisi diwar se koi taaruf tha nahin

un dinon ki baat hai jab dar-ba-dar hote the hum

samne aate the jab to DhunDte the kashtiyan

chaar aankhon se bani ek jhil par hote the hum

yun bana dete the jaise sher ho jate hain ab

harf-e-kun ka bhi kabhi dast-e-hunar hote the hum

ek ghaDi aisi bhi aati thi mulaqaton ke bich

tum udhar hote the jis ke aur udhar hote the hum