samne ek be-rahm haqiqat nangi ho kar nachti hai

sāmne ik be-rahm haqīqat nañgī ho kar nāchtī hai

us kī āñkhoñ se ab merī maut kī ḳhvāhish jhāñktī hai

jism kā jaadū is duniyā meñ sar chaḌh kar jab boltā hai

ruuh mirī sharminda ho kar apnā chehra Dhāñptī hai

us kī jholī meñ sab khoTe sikke Daale jā.eñge

jāntī hai ye andhī bhikāran phir bhī din bhar māñgtī hai

merā ḳhuun piyā to us ko taaza lahū kī chaaT lagī

ab vo nāgin apnī zabāñ se apnā lahū bhī chāTtī hai

ab kī baar ai buzdil qismat khul kar mere sāmne aa

kyuuñ ik dhachkā roz lagā kar baaqī kal par Tāltī hai

maazī kī turbat se nikal aatī hai kisī kī yaad kī laash

merī soch mirī dushman hai roz musībat Dāltī hai

sahrā kā bādal do būñdeñ barsā kar uḌ jaatā hai

pyāsī banjar bāñjh zamīñ kuchh aur ziyāda hāñptī hai

ab tak soī huī thī vo āsā.ish ke gahvāre meñ

añgḌā.ī sī le kar 'shabnam' aaj anā kyuuñ jāgtī hai

samne ek be-rahm haqiqat nangi ho kar nachti hai

us ki aankhon se ab meri maut ki KHwahish jhankti hai

jism ka jadu is duniya mein sar chaDh kar jab bolta hai

ruh meri sharminda ho kar apna chehra Dhanpti hai

us ki jholi mein sab khoTe sikke Dale jaenge

jaanti hai ye andhi bhikaran phir bhi din bhar mangti hai

mera KHun piya to us ko taza lahu ki chaT lagi

ab wo nagin apni zaban se apna lahu bhi chaTti hai

ab ki bar ai buzdil qismat khul kar mere samne aa

kyun ek dhachka roz laga kar baqi kal par Talti hai

mazi ki turbat se nikal aati hai kisi ki yaad ki lash

meri soch meri dushman hai roz musibat Dalti hai

sahra ka baadal do bunden barsa kar uD jata hai

pyasi banjar banjh zamin kuchh aur ziyaada hanpti hai

ab tak soi hui thi wo aasaish ke gahware mein

angDai si le kar 'shabnam' aaj ana kyun jagti hai