samne se mere katra ke gae hain aise

sāmne se mire katrā ke ga.e haiñ aise

maiñ ne dekhā nahīñ jaate hue un ko jaise

mashvare dete rahe jo mujhe muḳhlis kī tarah

kyā kahūñ un se bhī khātā rahā dhoke kaise

sar se pairoñ talak ik āla-e-mausīqī haiñ

vāqafiyyat nahīñ koī jinheñ sur se lai se

bech do saarā jahāñ bhī to nahīñ bhar saktā

mere kashkol meñ aa sakte haiñ itne paise

apne qātil bhī haqīqat meñ vahī hote haiñ

kaam lete haiñ lahū kā jo sharābī mai se

ek muddat meñ parakhne kā hunar aatā hai

be-vafā kah duuñ use pahlī nazar meñ kaise

qīmtī la.al bhī gudḌī meñ huā karte haiñ

aisoñ-vaisoñ ko samajhnā nahīñ aise-vaise

khule māhaul meñ jo mujh ko liye phirte haiñ

un ko 'vājid' maiñ ghuTan dil kī dikhā.ūñ kaise

samne se mere katra ke gae hain aise

main ne dekha nahin jate hue un ko jaise

mashware dete rahe jo mujhe muKHlis ki tarah

kya kahun un se bhi khata raha dhoke kaise

sar se pairon talak ek aala-e-mausiqi hain

waqafiyyat nahin koi jinhen sur se lai se

bech do sara jahan bhi to nahin bhar sakta

mere kashkol mein aa sakte hain itne paise

apne qatil bhi haqiqat mein wahi hote hain

kaam lete hain lahu ka jo sharabi mai se

ek muddat mein parakhne ka hunar aata hai

be-wafa kah dun use pahli nazar mein kaise

qimti lal bhi gudDi mein hua karte hain

aison-waison ko samajhna nahin aise-waise

khule mahaul mein jo mujh ko liye phirte hain

un ko 'wajid' main ghuTan dil ki dikhaun kaise