samne tu main ba-wuzu bhi nahin

sāmne tū maiñ bā-vuzū bhī nahīñ

aur tāhir nazar kī ḳhū bhī nahīñ

shor dil kar rahā hai siine meñ

aur bas meñ rag-e-gulū bhī nahīñ

sajda bas sajda shukr kā sajda

zehn meñ kaun hai jo tū bhī nahīñ

chāk-dāman libās-e-jism to hai

haañ koī sūrat-e-rafū bhī nahīñ

aa utar dekh bas hai ishq terā

in ragoñ meñ to ab lahū bhī nahīñ

ye ḳhamoshī koī ḳhamoshī hai

dasht-o-sahrā meñ hā-o-hū bhī nahīñ

tauba zauq-e-gunāh uf tauba

is ḳhatā se tū surḳh-rū bhī nahīñ

ham-kalāmī kā daur ḳhatm huā

tū hai pahlū meñ guftugū bhī nahīñ

tum se milne ke baad ai 'kausar'

ab koī aur aarzū bhī nahīñ

samne tu main ba-wuzu bhi nahin

aur tahir nazar ki KHu bhi nahin

shor dil kar raha hai sine mein

aur bas mein rag-e-gulu bhi nahin

sajda bas sajda shukr ka sajda

zehn mein kaun hai jo tu bhi nahin

chaak-daman libas-e-jism to hai

han koi surat-e-rafu bhi nahin

aa utar dekh bas hai ishq tera

in ragon mein to ab lahu bhi nahin

ye KHamoshi koi KHamoshi hai

dasht-o-sahra mein ha-o-hu bhi nahin

tauba zauq-e-gunah uf tauba

is KHata se tu surKH-ru bhi nahin

ham-kalami ka daur KHatm hua

tu hai pahlu mein guftugu bhi nahin

tum se milne ke baad ai 'kausar'

ab koi aur aarzu bhi nahin