sanehe lakh sahi hum pe guzarne wale

sānehe laakh sahī ham pe guzarne vaale

rāsto ham bhī nahīñ Dar ke Thaharne vaale

mārne vaale koī aur sabab DhūñD ki ham

maare jaane ke to Dar se nahīñ marne vaale

kitnī jaldī meñ huā ḳhatm mulāqāt kā vaqt

varna kyā kyā na savālāt the karne vaale

guftugū ḳhud se huī apne hī haq meñ varna

sach se is baar to ham bhī the mukarne vaale

zindagī apnī tamāsha hī sahī lekin ham

koī kirdār musalsal nahīñ karne vaale

ek kāġhaz ke bharose pe banā kar kashtī

gahre paanī meñ utarte haiñ utarne vaale

pyaas bhaḌkā.eñ jahāñ sirf ravayyoñ ke sarāb

ham bhī is dasht meñ paañv nahīñ dharne vaale

ham meñ kyuuñ baat kabhī ho nahīñ paatī 'sīmā'

ham kisī roz yahī baat the karne vaale

sanehe lakh sahi hum pe guzarne wale

rasto hum bhi nahin Dar ke Thaharne wale

marne wale koi aur sabab DhunD ki hum

mare jaane ke to Dar se nahin marne wale

kitni jaldi mein hua KHatm mulaqat ka waqt

warna kya kya na sawalat the karne wale

guftugu KHud se hui apne hi haq mein warna

sach se is bar to hum bhi the mukarne wale

zindagi apni tamasha hi sahi lekin hum

koi kirdar musalsal nahin karne wale

ek kaghaz ke bharose pe bana kar kashti

gahre pani mein utarte hain utarne wale

pyas bhaDkaen jahan sirf rawayyon ke sarab

hum bhi is dasht mein panw nahin dharne wale

hum mein kyun baat kabhi ho nahin pati 'sima'

hum kisi roz yahi baat the karne wale