sanjh-sawere phirte hain hum jaane kis virane mein

sāñjh-savere phirte haiñ ham jaane kis vīrāne meñ

sāvan jaisī dhuup likhī hai qismat ke har ḳhāne meñ

us ne pyaar ke saare bandhan ik lamhe meñ toḌ diye

jis kī ḳhātir rusvā haiñ ham is be-dard zamāne meñ

shab kī siyāhī aur baḌhegī aur sitāre TūTeñge

kuchh to vaqt lagegā āḳhir nayā saverā aane meñ

kitne pīpal suukh ga.e haiñ kitne dariyā ḳhushk hue

kitne mausam biit ga.e haiñ bādal ko bahlāne meñ

sīdhe-sāde panchhī kī mānind vo shāyad lauT aa.e

aas lagā.e baiThe haiñ ham apne hairat-ḳhāne meñ

paḌhnā likhnā chhūT gayā hai sājan jab se ruuTh gayā

kaḌvī kaḌvī se lagtī hai ab to har shai khāne meñ

sanjh-sawere phirte hain hum jaane kis virane mein

sawan jaisi dhup likhi hai qismat ke har KHane mein

us ne pyar ke sare bandhan ek lamhe mein toD diye

jis ki KHatir ruswa hain hum is be-dard zamane mein

shab ki siyahi aur baDhegi aur sitare TuTenge

kuchh to waqt lagega aaKHir naya sawera aane mein

kitne pipal sukh gae hain kitne dariya KHushk hue

kitne mausam bit gae hain baadal ko bahlane mein

sidhe-sade panchhi ki manind wo shayad lauT aae

aas lagae baiThe hain hum apne hairat-KHane mein

paDhna likhna chhuT gaya hai sajan jab se ruTh gaya

kaDwi kaDwi se lagti hai ab to har shai khane mein