sans ke ham-rah shoale ki lapak aane ko hai

saañs ke ham-rāh sho.ale kī lapak aane ko hai

aisā lagtā hai koī raushan mahak aane ko hai

phir pas-e-paspā.ī merā hausla zinda huā

āsmāñ se phir koī taaza kumak aane ko hai

ek ḳhilqat hī nahīñ hai bad-gumānī kā shikār

us kī jānib se mire bhī dil meñ shak aane ko hai

ek muddat se charāġh-e-sard sā rakkhā huuñ maiñ

is tavaqqo.a par ki āñchal kī bhaḌak aane ko hai

ai safar kī rā.egānī āyatoñ ke saath chal

phir vahī jañgal vahī suunī saḌak aane ko hai

bed-e-majnūñ ho rahe haiñ tiir kyā talvār kyā

mere dushman meñ bhī ab shāyad lachak aane ko hai

ab to is chhat par koī māh-e-shabāna chāhiye

sāya-e-qāmat fasīl-e-shām tak aane ko hai

rāste gum ho rahe haiñ dhund kī pahnā.ī meñ

sardiyoñ kī shaam hai phir us kā chak aane ko hai

sans ke ham-rah shoale ki lapak aane ko hai

aisa lagta hai koi raushan mahak aane ko hai

phir pas-e-paspai mera hausla zinda hua

aasman se phir koi taza kumak aane ko hai

ek KHilqat hi nahin hai bad-gumani ka shikar

us ki jaanib se mere bhi dil mein shak aane ko hai

ek muddat se charagh-e-sard sa rakkha hun main

is tawaqqoa par ki aanchal ki bhaDak aane ko hai

ai safar ki raegani aayaton ke sath chal

phir wahi jangal wahi suni saDak aane ko hai

bed-e-majnun ho rahe hain tir kya talwar kya

mere dushman mein bhi ab shayad lachak aane ko hai

ab to is chhat par koi mah-e-shabana chahiye

saya-e-qamat fasil-e-sham tak aane ko hai

raste gum ho rahe hain dhund ki pahnai mein

sardiyon ki sham hai phir us ka chak aane ko hai