sans ki dhaar zara ghusti zara kaTti hai

saañs kī dhaar zarā ghustī zarā kāTtī hai

kyā darāñtī hai ki ḳhud fasl-e-fanā kāTtī hai

ek tasvīr jo dīvār se uljhī thī kabhī

ab mirī nazroñ meñ rahne kī sazā kāTtī hai

terī sargoshī se kaT jaatā hai yuuñ sañg-e-sukūt

jis tarah habs ke patthar ko havā kāTtī hai

qat.a kartā hai mire halqa-e-vīrānī ko

niiñd jo moḌ pas-e-ḳhvāb sirā kāTtī hai

yūñhī girtī nahīñ ashkoñ kī siyāhī dil par

an-kahā likhtī kabhī likkhā huā kāTtī hai

chīḳhnā chāhūñ to Dastī hai ḳhamoshī 'shāriq'

chup rahūñ to mujhe zahrīlī sadā kāTtī hai

sans ki dhaar zara ghusti zara kaTti hai

kya daranti hai ki KHud fasl-e-fana kaTti hai

ek taswir jo diwar se uljhi thi kabhi

ab meri nazron mein rahne ki saza kaTti hai

teri sargoshi se kaT jata hai yun sang-e-sukut

jis tarah habs ke patthar ko hawa kaTti hai

qata karta hai mere halqa-e-virani ko

nind jo moD pas-e-KHwab sira kaTti hai

yunhi girti nahin ashkon ki siyahi dil par

an-kaha likhti kabhi likkha hua kaTti hai

chiKHna chahun to Dasti hai KHamoshi 'shaariq'

chup rahun to mujhe zahrili sada kaTti hai