sans ukhDi hui sukhe hue lab kuchh bhi nahin

saañs ukhḌī huī sūkhe hue lab kuchh bhī nahīñ

pyaas kā naam hī raushan hai bas ab kuchh bhī nahīñ

sub.h tak phir bhī nahīñ bujhte haiñ āñkhoñ ke charāġh

jāntā huuñ ki pas-e-parda-e-shab kuchh bhī nahīñ

sar-e-ehsās pe dastār-e-fazīlat na rahī

bas ki ab silsila-e-nām-o-nasab kuchh bhī nahīñ

gul-e-imkān na sarsabz koī barg-e-umīd

ya.anī ab ke to sar-e-shāḳh-e-talab kuchh bhī nahīñ

be-ta.alluq rahe barsoñ to koī baat bhī thī

in dinoñ tum se na milne kā sabab kuchh bhī nahīñ

vaz.a-dārī hī bikharne nahīñ detī 'aḳhtar'

varna ham TuuTe hue logoñ meñ ab kuchh bhī nahīñ

sans ukhDi hui sukhe hue lab kuchh bhi nahin

pyas ka nam hi raushan hai bas ab kuchh bhi nahin

subh tak phir bhi nahin bujhte hain aankhon ke charagh

jaanta hun ki pas-e-parda-e-shab kuchh bhi nahin

sar-e-ehsas pe dastar-e-fazilat na rahi

bas ki ab silsila-e-nam-o-nasab kuchh bhi nahin

gul-e-imkan na sarsabz koi barg-e-umid

yani ab ke to sar-e-shaKH-e-talab kuchh bhi nahin

be-talluq rahe barson to koi baat bhi thi

in dinon tum se na milne ka sabab kuchh bhi nahin

waza-dari hi bikharne nahin deti 'aKHtar'

warna hum TuTe hue logon mein ab kuchh bhi nahin