sanson ka iztirab hai bhaTke wajud mein

sāñsoñ kā iztirāb hai bhaTke vajūd meñ

har lamha ehtisāb hai bhaTke vajūd meñ

bāhar haiñ tīrgī kī ridā.eñ tanī huiiñ

mushkil meñ āftāb hai bhaTke vajūd meñ

ḳhud ko talāshne kī manāzil pe huuñ khaḌā

ye vaj.h-e-inqalāb hai bhaTke vajūd meñ

kaisī 'ajīb miTTī se tashkīl kī mirī

kyoñ hirs be-hisāb hai bhaTke vajūd meñ

jab tak ḳhirad ko 'ishq ne denī haiñ mohlateñ

tab tak gunah savāb hai bhaTke vajūd meñ

samjhegā kaun ruuh meñ chīḳhoñ kī bebasī

jo shāmil-e-nisāb hai bhaTke vajūd meñ

har aah ko maiñ she'r kī detā huuñ sūrateñ

har pal nayā 'azāb hai bhaTke vajūd meñ

karvaT badalnī chāhiye ab nafs ko mire

'mājid' jo mahv-e-ḳhvāb hai bhaTke vajūd meñ

sanson ka iztirab hai bhaTke wajud mein

har lamha ehtisab hai bhaTke wajud mein

bahar hain tirgi ki ridaen tani huin

mushkil mein aaftab hai bhaTke wajud mein

KHud ko talashne ki manazil pe hun khaDa

ye wajh-e-inqalab hai bhaTke wajud mein

kaisi 'ajib miTTi se tashkil ki meri

kyon hirs be-hisab hai bhaTke wajud mein

jab tak KHirad ko 'ishq ne deni hain mohlaten

tab tak gunah sawab hai bhaTke wajud mein

samjhega kaun ruh mein chiKHon ki bebasi

jo shamil-e-nisab hai bhaTke wajud mein

har aah ko main she'r ki deta hun suraten

har pal naya 'azab hai bhaTke wajud mein

karwaT badalni chahiye ab nafs ko mere

'majid' jo mahw-e-KHwab hai bhaTke wajud mein