saqi bhale phaTakne na de pas jam ke

saaqī bhale phaTakne na de paas jaam ke

niyyat to bāñdh sakte haiñ pīchhe imaam ke

qadmoñ meñ deñ jagah hameñ ahl-e-karam kahīñ

ham rāñdgāñ haiñ sajda-gah-e-ḳhās-o-ām ke

āñkhoñ kī baat chhiḌ ga.ī bātoñ ke darmiyān

mai-ḳhāne vaale rah ga.e paimāne thaam ke

vaa.iz ko ūñch-nīch mohabbat kī kyā patā

ye mas.ale nahīñ ulamā-e-kirām ke

kyā ḳhuub vahī pīr-e-ḳharābāt ko huī

jhagḌe haiñ sab harām halāl-o-harām ke

do-chār ashk haal pe mere bahā.iye

shabnam gire laboñ pe kisī tishna-kām ke

aatā na ho barāt sitāroñ kī le ke chāñd

ruḳhsār surḳh kyuuñ hue jaate haiñ shaam ke

insān haiñ farishta-o-iblīs ham nahīñ

qaa.il nahīñ rukū-o-sujūd-o-qayām ke

ahl-e-zamāna un se na bāñdheñ tavaqquāt

ushshāq aadmī haiñ hasīnoñ ke kaam ke

shahr-e-butāñ meñ haiñ jo dar-e-mai-kada pe dafn

pahuñche hue buzurg the 'rāhīl' naam ke

saqi bhale phaTakne na de pas jam ke

niyyat to bandh sakte hain pichhe imam ke

qadmon mein den jagah hamein ahl-e-karam kahin

hum randgan hain sajda-gah-e-KHas-o-am ke

aankhon ki baat chhiD gai baaton ke darmiyan

mai-KHane wale rah gae paimane tham ke

waiz ko unch-nich mohabbat ki kya pata

ye masale nahin ulama-e-kiram ke

kya KHub wahi pir-e-KHarabaat ko hui

jhagDe hain sab haram halal-o-haram ke

do-chaar ashk haal pe mere bahaiye

shabnam gire labon pe kisi tishna-kaam ke

aata na ho baraat sitaron ki le ke chand

ruKHsar surKH kyun hue jate hain sham ke

insan hain farishta-o-iblis hum nahin

qail nahin ruku-o-sujud-o-qayam ke

ahl-e-zamana un se na bandhen tawaqquat

ushshaq aadmi hain hasinon ke kaam ke

shahr-e-butan mein hain jo dar-e-mai-kada pe dafn

pahunche hue buzurg the 'rahil' nam ke