saqi-e-bazm-e-tarab se mai-kade se jam se

sāqī-e-bazm-e-tarab se mai-kade se jaam se

kaam rakkhā hai hamesha ham ne apne kaam se

ho ke dil-bardashta uTThe haiñ bazm-e-ām se

ab chale ā.eñge ai qāsid vo mere naam se

shaiḳh jī ab mai-kade meñ pāk-bāzī kā savāl

pūchh leñge ham tumhāre jāma-e-ehrām se

qaidī-e-zindān-e-ġham haiñ ham jahān-e-zīst meñ

bhaag jaanā hai nikal kar ālam-e-ajsām se

ham ne ab samjhā hai aakar bazm-e-hastī kā fareb

rah ga.e haiñ jab lipaT kar dāman-e-auhām se

merī tāb-e-dīd kī ik āzmā.ish ke liye

aaj to jalvoñ kī bārish ho rahī hai baam se

kyā batā.ūñ kaise kaise mujh pe Dhaa.e haiñ sitam

gardish-e-qismat ne mil kar gardish-e-ayyām se

ham to ai 'ḳhushtar' samajhte haiñ ki mar kar jī uThe

maut ne ham ko chhuḌāyā ziist ke ālām se

saqi-e-bazm-e-tarab se mai-kade se jam se

kaam rakkha hai hamesha hum ne apne kaam se

ho ke dil-bardashta uTThe hain bazm-e-am se

ab chale aaenge ai qasid wo mere nam se

shaiKH ji ab mai-kade mein pak-bazi ka sawal

puchh lenge hum tumhaare jama-e-ehram se

qaidi-e-zindan-e-gham hain hum jahan-e-zist mein

bhag jaana hai nikal kar aalam-e-ajsam se

hum ne ab samjha hai aakar bazm-e-hasti ka fareb

rah gae hain jab lipaT kar daman-e-auham se

meri tab-e-did ki ek aazmaish ke liye

aaj to jalwon ki barish ho rahi hai baam se

kya bataun kaise kaise mujh pe Dhae hain sitam

gardish-e-qismat ne mil kar gardish-e-ayyam se

hum to ai 'KHushtar' samajhte hain ki mar kar ji uThe

maut ne hum ko chhuDaya zist ke aalam se