ساقیٔ بزم طرب سے میکدے سے جام سے

ساقیٔ بزم طرب سے میکدے سے جام سے

کام رکھا ہے ہمیشہ ہم نے اپنے کام سے

ہو کے دل برداشتہ اٹھے ہیں بزم عام سے

اب چلے آئیں گے اے قاصد وہ میرے نام سے

شیخ جی اب میکدے میں پاک بازی کا سوال

پوچھ لیں گے ہم تمہارے جامۂ احرام سے

قیدیٔ زندان غم ہیں ہم جہان زیست میں

بھاگ جانا ہے نکل کر عالم اجسام سے

ہم نے اب سمجھا ہے آکر بزم ہستی کا فریب

رہ گئے ہیں جب لپٹ کر دامن اوہام سے

میری تاب دید کی اک آزمائش کے لئے

آج تو جلوؤں کی بارش ہو رہی ہے بام سے

کیا بتاؤں کیسے کیسے مجھ پہ ڈھائے ہیں ستم

گردش قسمت نے مل کر گردش ایام سے

ہم تو اے خوشترؔ سمجھتے ہیں کہ مر کر جی اٹھے

موت نے ہم کو چھڑایا زیست کے آلام سے