saqi-e-dauran kahan wo tere mai-KHane gae

sāqī-e-daurāñ kahāñ vo tere mai-ḳhāne ga.e

vo ināyat vo saḳhāvat jām-o-paimāne ga.e

ai mirī himmat zarā kuchh aur merā saath de

aa ga.ī nazdīk manzil duur vīrāne ga.e

chain se soyā huā thā intizār-e-hashr meñ

aap merī qabr par kyuuñ phuul barsāne ga.e

ai musībat terā aanā bhī hai goyā mo.ajiza

dost aur dushman ke saare farq pahchāne ga.e

ab pashemāñ huuñ ki kyuuñ un ko kahā va.ada shikan

ik zarā sī baat par muddat ke yārāne ga.e

bandagī kā maqsad-e-ālā to puurā kar diyā

sajda karne ham haram ko yā ki but-ḳhāne ga.e

'zabt' apnī dil-lagī ke vāste jalte haiñ sab

sham.a jab bujhne lagī to duur parvāne ga.e

saqi-e-dauran kahan wo tere mai-KHane gae

wo inayat wo saKHawat jam-o-paimane gae

ai meri himmat zara kuchh aur mera sath de

aa gai nazdik manzil dur virane gae

chain se soya hua tha intizar-e-hashr mein

aap meri qabr par kyun phul barsane gae

ai musibat tera aana bhi hai goya moajiza

dost aur dushman ke sare farq pahchane gae

ab pasheman hun ki kyun un ko kaha wada shikan

ek zara si baat par muddat ke yarane gae

bandagi ka maqsad-e-ala to pura kar diya

sajda karne hum haram ko ya ki but-KHane gae

'zabt' apni dil-lagi ke waste jalte hain sab

shama jab bujhne lagi to dur parwane gae