saqi jo diye jae ye kah kar ki piye ja

saaqī jo diye jaa.e ye kah kar ki piye jā

to maiñ bhī piye jā.ūñ ye kah kar ki diye jā

jaane kī jo zid hai to mujhe zahr diye jā

itnā to kahā maan le itnā to kiye jā

kuchh aur na kar mujh pe jafā.eñ tū kiye jā

kuchh aur na le merī duā.eñ tū liye jā

kyā lazzat-e-ta.azīr ne majbūr kiyā hai

aatā hai yahī jī meñ ki taqsīr kiye jā

kam-baḳht 'rasā' terī rasā.ī nahīñ un tak

tū ḳhuub sā islām ko badnām kiye jā

saqi jo diye jae ye kah kar ki piye ja

to main bhi piye jaun ye kah kar ki diye ja

jaane ki jo zid hai to mujhe zahr diye ja

itna to kaha man le itna to kiye ja

kuchh aur na kar mujh pe jafaen tu kiye ja

kuchh aur na le meri duaen tu liye ja

kya lazzat-e-tazir ne majbur kiya hai

aata hai yahi ji mein ki taqsir kiye ja

kam-baKHt 'rasa' teri rasai nahin un tak

tu KHub sa islam ko badnam kiye ja