saqi ki nawazish ne to aur aag laga di
saaqī kī navāzish ne to aur aag lagā dī
duniyā ye samajhtī hai mirī pyaas bujhā dī
ek baar tujhe aql ne chāhā thā bhulānā
sau baar junūñ ne tirī tasvīr dikhā dī
is baat ko kahte hue Darte haiñ safīne
tūfāñ ko ḳhudī dāman-e-sāhil ne havā dī
maanā ki maiñ pāmāl huā zaḳhm bhī khaa.e
auroñ ke liye raah to āsān banā dī
utnī to mai-e-nāb meñ garmī nahīñ hotī
saaqī ne koī chiiz nigāhoñ se milā dī
vo chain se baiThe haiñ mire dil ko miTā kar
ye bhī nahīñ ehsās ki kyā chiiz miTā dī
ai bād-e-chaman tujh ko na aanā thā qafas meñ
tū ne to mirī qaid kī mī.ād baḌhā dī
le de ke tire dāman-e-ummīd meñ 'māhir'
ek chiiz javānī thī javānī bhī luTā dī
saqi ki nawazish ne to aur aag laga di
duniya ye samajhti hai meri pyas bujha di
ek bar tujhe aql ne chaha tha bhulana
sau bar junun ne teri taswir dikha di
is baat ko kahte hue Darte hain safine
tufan ko KHudi daman-e-sahil ne hawa di
mana ki main pamal hua zaKHm bhi khae
auron ke liye rah to aasan bana di
utni to mai-e-nab mein garmi nahin hoti
saqi ne koi chiz nigahon se mila di
wo chain se baiThe hain mere dil ko miTa kar
ye bhi nahin ehsas ki kya chiz miTa di
ai baad-e-chaman tujh ko na aana tha qafas mein
tu ne to meri qaid ki miad baDha di
le de ke tere daman-e-ummid mein 'mahir'
ek chiz jawani thi jawani bhi luTa di
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
