saqi ne ki nigah to arman nikal gae

saaqī ne kī nigāh to armāñ nikal ga.e

jab tak sharāb aa.e ka.ī daur chal ga.e

ye asr-e-nau hai bāda-kashoñ hosh meñ raho

sañbhlo ki mai-kashī ke tarīqe badal ga.e

bad-baḳht haiñ jo kūcha-e-mahbūb chhoḌ kar

dīvāna-vār jānib-e-sahrā nikal ga.e

pahchān kar bhī tum mujhe pahchānte nahīñ

do din rahe jo duur to itne badal ga.e

sharminda mehr-o-māh bhī haiñ jin ke nuur se

aise charāġh rāh-e-mohabbat meñ jal ga.e

rūdād-e-fasl-e-gul na sunā mauja-e-nasīm

sun kar chaman kā haal kaleje dahal ga.e

saaqī tirī nigāh meñ aisā asar bhī hai

bahke ye bāda-ḳhvār jahāñ par sañbhal ga.e

'shā.ir' kahāñ kī fikr kahāñ kī suḳhanvarī

jazbāt-e-ishq sher ke sāñche meñ Dhal ga.e

saqi ne ki nigah to arman nikal gae

jab tak sharab aae kai daur chal gae

ye asr-e-nau hai baada-kashon hosh mein raho

sanbhlo ki mai-kashi ke tariqe badal gae

bad-baKHt hain jo kucha-e-mahbub chhoD kar

diwana-war jaanib-e-sahra nikal gae

pahchan kar bhi tum mujhe pahchante nahin

do din rahe jo dur to itne badal gae

sharminda mehr-o-mah bhi hain jin ke nur se

aise charagh rah-e-mohabbat mein jal gae

rudad-e-fasl-e-gul na suna mauja-e-nasim

sun kar chaman ka haal kaleje dahal gae

saqi teri nigah mein aisa asar bhi hai

bahke ye baada-KHwar jahan par sanbhal gae

'shair' kahan ki fikr kahan ki suKHanwari

jazbaat-e-ishq sher ke sanche mein Dhal gae