ساقی نے کی نگاہ تو ارماں نکل گئے

ساقی نے کی نگاہ تو ارماں نکل گئے

جب تک شراب آئے کئی دور چل گئے

یہ عصر نو ہے بادہ کشوں ہوش میں رہو

سنبھلو کہ مے کشی کے طریقے بدل گئے

بد بخت ہیں جو کوچۂ محبوب چھوڑ کر

دیوانہ وار جانب صحرا نکل گئے

پہچان کر بھی تم مجھے پہچانتے نہیں

دو دن رہے جو دور تو اتنے بدل گئے

شرمندہ مہر و ماہ بھی ہیں جن کے نور سے

ایسے چراغ راہ محبت میں جل گئے

روداد فصل گل نہ سنا موجۂ نسیم

سن کر چمن کا حال کلیجے دہل گئے

ساقی تری نگاہ میں ایسا اثر بھی ہے

بہکے یہ بادہ خوار جہاں پر سنبھل گئے

شاعرؔ کہاں کی فکر کہاں کی سخنوری

جذبات عشق شعر کے سانچے میں ڈھل گئے