saqi ruKH-e-hayat se parda uTha diya

saaqī ruḳh-e-hayāt se parda uThā diyā

jām-e-sifāl meñ ye mujhe kyā pilā diyā

'bismil' hī thā jo vaqt-e-ajal muskurā diyā

duniyā ko us kī maut ne jiinā sikhā diyā

ik soz-e-nā-tamām ik andoh-e-be-sabāt

ai rahmat-e-tamām batā mujh ko kyā diyā

ham ne nahīñ to kis ne nazar ko zabān dī

hāl-e-zabūñ kahā na gayā aur sunā diyā

vo ḳhud sharāb le ke baḌheñ ḳhud kaheñ ki pī

be-sabr tū ne kis liye sāġhar baḌhā diyā

saaqī tirī adā kī qasam chuuk ho ga.ī

dekhā jo iltifāt to sāġhar baḌhā diyā

ham se kisī ke 'ishq meñ ye to nahīñ huā

har āstāñ pe sajda kiyā sar jhukā diyā

'bismil' kī maut kā jo koī le gayā payām

muñh se to kuchh vo kah na sake sar jhukā diyā

saqi ruKH-e-hayat se parda uTha diya

jam-e-sifal mein ye mujhe kya pila diya

'bismil' hi tha jo waqt-e-ajal muskura diya

duniya ko us ki maut ne jina sikha diya

ek soz-e-na-tamam ek andoh-e-be-sabaat

ai rahmat-e-tamam bata mujh ko kya diya

hum ne nahin to kis ne nazar ko zaban di

haal-e-zabun kaha na gaya aur suna diya

wo KHud sharab le ke baDhen KHud kahen ki pi

be-sabr tu ne kis liye saghar baDha diya

saqi teri ada ki qasam chuk ho gai

dekha jo iltifat to saghar baDha diya

hum se kisi ke 'ishq mein ye to nahin hua

har aastan pe sajda kiya sar jhuka diya

'bismil' ki maut ka jo koi le gaya payam

munh se to kuchh wo kah na sake sar jhuka diya