saqiya abr hai de jam shitab ek par ek

sāqiyā abr hai de jaam shitāb ek par ek

aaj mahfil meñ gire mast-e-sharāb ek par ek

gul-e-bāzī hai hasīnoñ meñ mirā afsāna

pheñk detā hai mohabbat kī kitāb ek par ek

josh par hai jo tirā husn to ai parda-nashīñ

roz kartā hai ġhazab band-e-naqāb ek par ek

toḌ is tarah se ai nāla-e-dil sātoñ falak

ki gireñ TuuT ke ye ḳhāna-ḳharāb ek par ek

lab-e-jū sair ko aaya hai jo vo bahr-e-jamāl

TuuTā paḌtā hai tamāshe ko habāb ek par ek

yaad aatī hai unheñ dam-ba-dam ik baat na.ī

roz aatā hai mire ḳhat kā javāb ek par ek

jab kabhī 'dāġh' kiyā ham ne savāl-e-bosa

saikḌoñ us ne diye saḳht javāb ek par ek

saqiya abr hai de jam shitab ek par ek

aaj mahfil mein gire mast-e-sharab ek par ek

gul-e-bazi hai hasinon mein mera afsana

phenk deta hai mohabbat ki kitab ek par ek

josh par hai jo tera husn to ai parda-nashin

roz karta hai ghazab band-e-naqab ek par ek

toD is tarah se ai nala-e-dil saton falak

ki giren TuT ke ye KHana-KHarab ek par ek

lab-e-ju sair ko aaya hai jo wo bahr-e-jamal

TuTa paDta hai tamashe ko habab ek par ek

yaad aati hai unhen dam-ba-dam ek baat nai

roz aata hai mere KHat ka jawab ek par ek

jab kabhi 'dagh' kiya hum ne sawal-e-bosa

saikDon us ne diye saKHt jawab ek par ek